دروس الرزاله

موضوع: دروس الرزاله 2010-11-22, 11:23 pm

عايزين تكونو رزلين؟ يبقى انتو في المكان الصح

أولاً : ازاي ترخم على ضيوفك !

لو عازم صحابك على العشاء مثلاً .. خليك انت خلص اكل اول واحد

و بعدين روح بسرعة علشان تغسل ايديك .. و بعد ما تغسل ايديك افتح المياه

على الساخن بس .. و اقفل الساقع خالص . و استنى شوية 10 ثواني كدا

و بعدين اقفل المياه

و شوف بقى اللي بعدك هيحصله ايه

----

لو جالك ضيف رخم .. روح اعمل شاي و خلي الشاي سخن موحوح و ما تحطهوش في (مج) .. حطه

في كوبيات عادية و املاها للاخر علشان مايعرفش يمسكها

----

و لو عندك ضيف دمه تقيل و عاوز تفلسعه .. اظبط المنبه بتاع الموبايل بحيث كل شوية

يرن يرن و اعمل ان في واحد بيتصل بيك و قوله ( ايه ؟ .. دلوقتي لالا .. عندي ضيف ..

يمكن بعد 10 دقايق ولا حاجه ).

و ما تلبسش ساعة علشان كل شوية تسأله الساعه كام

و لما يكلمك ما تردش عليه من اول مرة .. اعمل نفسك ما سمعتوش

----

و لو واحد رخم و رغاي اتصل بيك حاول ترد عليه بكلام مختصر (ايوه .. ماشي .. حاضر ..

اوكي .. لا .. هشوف) .. و لو فضل يرغي كتير ما تردش عليه و اعمل نفسك بتكلم واحد

جنبك و بعدين قوله (آسف معلش كنت بكلم اخويا) و اعملها كزا مرة .. و لو طول قوي قوي

بقى و مش عارف تخلص منه .. اعمل ان الخط قطع .. و انك مش سامعه و قول (الو ..

الو .. الو .. انت روحت فين ؟؟ ... الو) و

بعدين تقوم قافل السكة

----

و لو في حد رافع ضغطك و عايز تعمل فيه مقلب

خد ولاعه وسخن مقبض الباب وبعدين اعمل نفسه بتتكلم في الموبايل و قوله : افتح الباب

..

---

ثانياً : ازاي ترخم على ناس في اوتوبيس !

اول حاجة

انت مثلا مسافرسفر طويل باتوبيس يعنى حوالى 8 او9 ساعات فى الطريق طبعا هيبقى الكل

على اخرة

ودى فرصتك يامعلم عشان تزهق فى خلق الله

اول متروح تحجز وتخلص حجز روح بدرى اول واحد وحط شنطتك اول شنطة فى شنطة الاتوبيس

دخلها جوة اوى عشان كل الى يجى يحط فوقها وتستخبى وانزل بدرى شوية قبل ما الاتوبيس

يقف والناس تنزل

انزل قلب فى الشنط وطلعها برة وقعها وافردها فى الشارع وتوه الشنط فى بعض بحجة انك

بتجيب شنطتك مهى اول شنطة من جوة هتلاقيها بعيد اوى هتلاقى كل الناس بتجرى فى

الشارع تدور على شنطها

تانى حاجة وانت بتحجز خلى كرسيك جمب الشباك

ادخل انت الاول ومتقعدش فى الكرسى الى انت حاجزة لا اقعد فى الى جمبة طبعا الراجل

الى جمبك فى الكرسى هايجى هيلاقى الكرسى الى جمب الشباك فاضى هايتبسط اوى هيدخل

يقعد فية جرى خلية يقعد سيبة متكلموش

سيبة ساعة واتنين لحد مايكيف على المكان ويسلام لو كان نام وفى عز نومة ازغدة فى

قلبة وقولة دا مكانى ياعم

هيزعق ويقول انا قعدت فية الاول طلع التذكرة وحطها فى عينة او انده للسواق او وقف

الاتوبيس واعمل خناقة لحد ماتقعد مكانك

تالت حاجة قعدت مكانك وظبطت نفسك ياعم طبعا الراجل الى جمبك دا مش طايق يبص فى

خلقتك خليك مبتسم دايما ومبسوط فى وشة عشان يتغاظ اكتر واديلة رست شوية

خش على الى قدامك شوية افرد رجلك من تحت الكرسى وخبط فى رجلية كل شوية وان اكلم

قولة اعملك اية رجلى طويلة ابقى احجزلك كرسيين ورا بعض ويسلام لو حاطط اكل تحت

الكرسى اخبطة وقعة فى الارض

وكدة يبقى خلصت على الى قدامك ارجع للى جمبك تانى

اول مينام ويريح نفسة صحية وقولة عدينى اروح الحمام لو سمحت هيقوم متغاظ طبعا وانت

بتعدى حط ايدك على وشة

دخلت الحمام وخلصت وانت خارج لاقيت واحد مستنى يدخل الحمام دى فرصتك يبقى فية ضحية

تالتة

قولة سورى نسيت حاجة وادخل تانى واقعد جوة ساعتين لحد مايولع فى نفسة برة طبعا مفيش

غير حمام واحد

واما تخرج لو لاقيتة لسة مستنى قولة على فكرة المية قطعة وسيبة وامشى

كدة يبقى انت كفرت كل الى فى الاتوبيس تقولى ياعم انت مزهقتش غير تلاتة هقولك لا

بطريقة الشنط زهقت شوية

واتمنى ليكم رحلة خنيقة

ثالثاً : ازاي ترخم على الناس في المحلات !

ادخل اى محل جزم ويسلام لو كان فية زباين اقعد استنى لحد مازبون يقلع جزمتة عشان

يقيس تقوم سادد منخيرك وتمسك بطنك وتقول اوف وتعمل اكنك عايز ترجع وتقول

لصاحب المحل ماترش معطر ياعم اية الريحة دى هتلاقى الراجل الى بيقيس الجزمة وشة بقى

زى الطمطماية

ادخل محل ملابس وبردة يكون جوة زباين اقعد لحد ما واحد يقيس وهوا خارج اضحك وهقهق

اوى ويسلام لو وقعت على الارض من الضحك وبصلة من فوق لتحت خلية يشك انة مسخرة

هتلاقية عملها على روحه

ادخل اى محل واستنى اعمل اى حاجة لحد ما بنات يدخلوا طبعا صاحب المحل هيخلصلك الاول

عشان انت جى الاول قولة لا خلص المزمزيل الاول هتقولك شكرا والراجل هيقوك اوك اول

مايبدا معاها زعق اوى وقولة اية ياعم مش انا جى الاول ولا هيا كوسة ولا عشان بنت

يعنى سبحان الله يجدعان نموت نفسينا يعنى عشان رجالة وسيبة وامشى قبل مايكلم ولا

كلمة

شوف واحد ماشى فى الشارع وعدى من جمبة وامسك منخيرك وقول يخرب بيت الاكل اللي

بتاكلوه ده .. وبص له شوية بقرف وامشى فى حالك

وسخ جزمتك اوى اوى وادخل اى محل نضيف وسيراميك واقعد اجرى فية ودور على اى حاجة

طبعا هيتحرجوا يكلموك بس هما اصلا ميتين من الغيظ

وانت بتاكل في اي مطعم ارمي نفسك علي الارض وصرخ وسمع الناس اللي بتاكل وقول جالي

تسمم من الاكل

ورخم اكتر ومدتفعش حساب الاكل وامشى على كدة

رابعاً : ازاي ترخم على السواقين في الطرق !

لما يكون في نزلة بعد كيلو ولا حاجه .. ادي اشارة صفراء يمين و هدي و اول ماتيجي

جنب النزلة قوم داخل شمال و مسرع هتلاقي اللي وراك اتغاظ

سوق عربيتك في الاتجاه المعاكس واي عربيه تعدي من جنبك اشتم صاحبها

ههههههههههههههه اتمنى انى اكون رخمت عليكم بما فيه الكفايه

ازاي تكون رزل و انت في الكلية:- خش يا معلم على الدرس و اتعلم

فى الكلية هتقابل صاحبك وهتقعدوا على أى كافيه

هيجى الجارسون سيب صحبك يطلب الأول وبعدين استلم الجارسون بقى واديله نصيبه

قوله:عندك برجر ؟ هيقولك اه

قوله:حلو ؟ هيقولك تمام

قوله:اوك يبقى اكتب واحد شاورمة

طب عندك كبده ؟ هيقولك:ايوة قوله معمولة ازاى ؟

سيبه يرغى شوية وقوله انا اصلا مبحبش الكبدة فكك

حاول تطلب حاجات غريبة زى سندوتشات حلاوة طحينية على اساس انك فى سجن أبو زعبل

أو سندوتشات بيض أو بتنجان أو لبن العصفور أمسك فى الحاجات اللى مش موجودة كلها

المهم حاول تجيبله جفاف عقبال ماتطلب اللى انت عايزه

وأنت بتاكل بقى أتسلى على المخلل اللى مش عاجبك أرمى شوية على التربيزة وشوية على الأرض أنت وذوقك بقى

لو معاك كاتشب مفيش مانع تكتب أول حرف من اسمك على التربيزة ترسم قلب عادى يعنى المهم تخليله التربيزة شبه التورتة

ومتنساش تعيب على الأكل وأنت بتحاسب وكمان تقول الحساب غالى

فى المدرج أرشق نفسك بين أتنين متعرفهمش وابتدى الشغل بقى أتعامل على إنك صاحبهم من قرن

يضحكوا على حاجة اضحك معاهم كده يعنى المهم تركز معاهم كأنك من بقيت أهلهم ولا خلفوك ونسوك

أو طريقة تانية أتلكك لكل اللى جنبك كل ماحد ينطق كلمة قوله لو سمحت أسكت عشان أفهم

لو مسكتش أنا هقول للدكتور والحركة دى رذلة ومستفزة جدا بس اشطه يعنى

وياسلام لو واحد وواحدة يبقى أنت كده جبت من الآخر

لو جنبك واحد بيكتب يبقى اتفتحتلك طاقة القدر اقعد اسأله وعطله ومتخليهوش يكتب سطرين على بعض

استلم أى حد واسأله المحاضرة هتخلص امتى ؟ وكل فيمتو ثانية كده اسأله الساعة كام اصل أنا زهقت

طبعا هو اللى زهق وطهق من الكلية وبيقول ياريتنى ماكملت تعليم وكره حياته كلها زى باقى الضحايا

عايز تعمل دماغ حلوة روح على شباك شئون الطلبة المهم حاول تعمل أهبل وأنت داخل وعايز تقف أول واحد

هيرجعوك ورا تحاول تقف مكان أى حد وترذل على كله هما أصلا بيبقوا واقفين مش طايقين نفسهم

لو واقف تانى واحد كده مفيش مانع تزق اللى قدامك تلبسه فى الشباك الحديد وتقول الله ياجماعة ياللى ورا متزقوش

ومن قبل ماينطق ولا كلمة تقعد تقوله خلص يالا عشان غيرك ومتخليهوش يركز مع بتاع شئون الطلبة خالص

لما يجى دورك بقى بيبقوا عايزين يخلصوك ويكروتوك واللى واقفين وراك فى الطابور مستنينك تغور فى داهية بفارغ الصبر

خد وقتك كأنك بتحجز فى سينما و اسأل أسئلة كتير وكل مايقولك حاجة قوله مش فاهم معلش قول تانى فهمنى أعمل أيه بالظبط لحد ماتشل أكبر عدد ممكن

وبكده يبقى أنت مارست هوايتك وقضيت يوم رذل

ملحوظة صغيرة : لو الكلية مسكتك طحنتك انا مليش دعوة

ازاى تبقى رذل فى المواصلات

لو راكب فى باص أو ميكروباص وجنبك حد نايم اوعى تسيبه نايم

كل شوية اقعد قول وصلنا عشان يصحى مخضوض لو عمل اهبل صحيه وقوله مش انت نازل هنا بيتهيألى

لو مش نايم متسيبوش فى حاله برضه عيب عليك متجيش

ركز على سؤال واقعد اسألهوله كل شوية زى أنت نازل فين طب انت دفعت ولا لأ

لو قاعد هو جنب الشباك جوه وقالك عدينى قوله رجلى منملة مش قادر وخليه ينط زى القرد

أو قوله ماتنزل من الشباك

لو انت فى أتوبيس وقاعد على كرسى وجنبك ناس واقفة استمتع بقى وخدك وقتك

اتمطع بقى وقول ياسلام على الراحة الواحد مكنش عارف هيعمل أيه لو مش قاعد

لو العكس بقى اقعد اسأل كل واحد انت نازل فين واقعد قول بصوت عالى

ياجماعة محدش نازل قريب أصل انا عايز اقعد طول مانت واقف قول كده لحد مايقعدوك

لما الكمسرى يجى ياخد منك الاجرة اسأله على تمن كذا مكان

يعنى قوله هو لغاية الحتة الفلانية بكام طب لغاية الحتة دى بكام

اسأل على تمن كل الاماكن اللى تعرفها لحد مايقولك ياعم خلصنى رايح فين

قوله مانا عشان ابقى عارف بس وتقل فى العيار يمكن يسيبك ويمشى

لما يدى حد تذكرة قوله ورينى كده لو سمحت واقعد اتأمل فيها

لحد ما صاحبها يزهق ويشدها منك

فى مفتش بقى ساعات بيطلع يفتش على التذاكر وبيطلع على السريع كده وينزل

أنت بقى اوعى تديهاله على طول كده أزعل منك والله

دور عليها ساعة حط ايدك فى جيوبك مية مرة هيقولك خلص يا استاذ قوله ثوانى كانت معايا والله

واقلع الجذمة ودور فيها وفى الاخر طلعها من بوقك بعد مايكون هو مات من الملل وقوله مش قولتلك

كفاية كده بقى حرام المفروض تنزل قبل الناس ماتموت منك

أستنى رايح فين أنت نازل عادى كده ولا كأنك رذل ولا حاجة

وأنت نازل هيبقى فى ناس واقفة أعمل نفسك مش عارف تعدى

وحاول تجاهد على قد ماتقدر وتضيع الوقت اللى تقدر عليه

لحد الناس ماتشيلك وترميك بعد ماتكون جبتلهم السكر ورفعت ضغطتهم

دلوقتي بقى الرزالة ب الموبايل ركز معايا

الموبايل

بص ياسيدى أنت دلوقتى ماسك موبايلك وبتلعب فيه وبتسأل أى واحد جنبك أو حد متعرف عليه جديد رقمك كام ؟

سيبه يمليك نص الرقم كده وروح مشغل أى نغمة هو فاكرك بتسجل الرقم أتاريك بتلعب فى النغمات وهو بيملى عالفاضى

بتاخد الرقم من حد مش معاك رقمه وتقوله قولى رقمك وأنا هحفظه عشان الموبايل فاصل شحن

وشغل الغباء بقى كل مايقولهولك قوله غلط ومرة كده قولها صح يقولك تمام كده قوله اشطه يعنى هو كذا كذا وقوله غلط

هيقولك يابنى حرام عليك بقى قوله معلش معلش عشان احفظه بس وسوق الاستهبال لحد ماتحرق دمه

بتاخد الرقم من حد برضه قوله رن عليا عشان أسجل رقمك أنا حاطط الموبايل فى جيبى بس عامله صامت

ومليهوله غلط بقى هيرن عليك هيلاقى اللى بيفتح عليه ويقوله آلو وقوله معلش معلش مليتهولك غلط قال يعنى حد بيتلخبط فى رقمه

طريقة أضمن بقى قعد أخوك الصغير بموبايلك وقوله أنا خارج وأول ماتسمع صوت الموبايل أتكى على الزرار ده

الزرار الأخضر ده ؟ أيوة ياحبيبى الزرار ألأخضر ده وأقول آلو ؟ برافو عليك تعجبنى نصاحتك قول اللى أنت عايزه

وأطلع بقى يامعلم خد نمر ناس على قد ماتقدر أخوك يرد وأنت تقوله آآآخ نسيت الموبايل فى البيت وخليه يشيل بقى

كل ماتتفق مع حد على ميعاد قوله أبقى رن عليا قبلها بنص ساعة عشان لو نسيت بس وأستناه فى الموعد المرتقب

وأول ماتلمح اسمه رد علطول هيقولك بتفتح ليه ؟ قوله فاكرك بتتصل عشان غيرت الميعاد أو مش جاى قولت أطمن

بقى بذمتك قولت أطمن ولا قولت أرذل ماشى ماشى ماعلينا

قول لصحبك هات الموبايل بتاعك هعمل منه دقيقة هيقولك والله ممعيش غيرها برن بيها قوله ياعم دى مسألة حياه أو موت

وخد الموبايل بقى أتصل بمامتك أيوة ياماما عاملة أيه ياحبيبتى ؟ أنتى عاملة أيه على الغدا النهارده ؟

محشى الله بموت فيه طب وأيه تانى ياماما ياماما ياماما عفوا لقد نفذ رصيدكم

لو صحبك معاه كريديت كتير بقى أبقى خلى مامتك تحكيلك عملت المحشى ازاى

- صحبك بيتصل بس اتأكد انه بيتصل عشان حاجة مهمة عشان ميقفلش السكة فى وشك وكل شوية قوله خليك معايا كده

أنت رجعت من الشغل يا بابا ؟ طب ماهو من ساعة مانت اتولدت وهو بيرجع من الشغل فى الوقت ده أيه الجديد

أرجع لصحبك بقى أيوة معاك طب أستنى أستنى أيه الصوت ده ياماما أنتى فى المطبخ ؟ ماهى طول عمرها بتحضر الغدا فى الوقت ده

طبعا الله يكون فى عون صاحبك اللى مش عارف ياخد منك كلمتين على بعض

قول لصحبك حلوة أوى الرسالة دى هنقلها بس طويلة أوى طبعا كلنا فاهمين أنت بتلمح لأيه يارذل

(هو عشان يطلع ذوق معاك هيقولك خلاص ياسيدى أبعت اللى عاجباك دى (واحدة بس

طبعا فهمتوا قصدى من اللى بين القوسين أبعت بقى الرسايل كلها حتى لو فيها كلمنى شكرا

وقوله بصراحة كله عجبنى بس ياخسارة الرصيد خلص كان ناقص واحدة نفسى أخدها

أستلم رقم ابعتله كل يوم التلاتة بتوع كلمنى شكرا ورن عليه كل فيمتو ثانية مرة يتصل بيك أفتح ومتتكلمش ولا كلمة

آلو آلو آلو رد ياحيوان وأنت باصص فى السما وعامل أهبل خليك كده بقى لحد مايغير الخط أو يبطل يشيل موبايلات

معاك موبايل فيه بلوتوث وقاعد فى مدرج الكلية أو سينما وكده أفتح الـ(notes)بتبقى اسمها بالعربى ملاحظات ده فى نوكيا

أكتب فيها - فكك منى - وأبعتها لكل اللى فاتحين طبعا أى حد هيستلمها هيقول أيه الرذل ده أنا يعنى كنت طلبت من خلقته حاجة

قول لصحبك معرفش يا أخى الموبايل بتاعى ماله هيقولك أيه يعنى فيه أيه ؟ قوله رن عليا كده هيرن عليك

أتكى على أى زرار فى الموبايل هيقوم فاتح عليه قوله شوفت بتكى على أى زرار يقوم الموبايل فاتح على اللى بيرن زيك كده

طبعا أنت مشغل خدمة(any key answer)

اللى هى خدمة أى زرار يرد على اللى بيتصل بيك وخليته يشيل المكالمة

قول لصحبك حولى جنيه رصيد عشان أرن بيه بدل مانا مفلس يعنى يرضيك كده ولا هتستخسر فيا جنيه

هيقولك لا مش هستخسر بس ازاى ؟ قوله تمام قولتلى ازاى تحولى ستة جنيه ولما يوصلوا أحولك أنا خمسة جنيه

هيقولك ماشى حول بقى يامعلم ولما تيجى تردهمله هيقولك مينفعش تحول رصيد وأنت رصيدك أقل من سبعة جنيه

وخليه يشيل الستة جنيه بحالهم والطريقة دى هدية منى ليكم

..

موضوع: رد: دروس الرزاله 2010-11-22, 11:39 pm

هههههههههههههه لو حبيت ترخم على الاعضاءاكتب موضوع طويل مثل هدا

موضوع: رد: دروس الرزاله 2010-11-22, 11:49 pm

ههههههههههههه

الرزاله والرخامه موووجوده
تسلمى يا قمر

..

موضوع: رد: دروس الرزاله 2010-11-23, 11:53 pm

ههههههههههههههههههههههههههههههههههههههههههههههههههه

موضوع: رد: دروس الرزاله 2010-11-23, 11:55 pm

احلى قمر كتب:: هههههههههههههه لو حبيت ترخم على الاعضاءاكتب موضوع طويل مثل هدا

ههههههههههههههههههههههههههههههههههه

100 %

» دروس فى الحياة
» دروس من الحياة
» دروس من الحياة
» دروس في الحب
» الحياة دروس..