سرير أمي

موضوع: سرير أمي 2019-11-03, 9:01 am

سرير امي

ما افتكرش امي في مرة قالتلنا اطلعوا بره اوضتي او انزلو من على سريري

.ونفس الشيء بعمله مع اولادي الي بشوف في عنيهم لمعه بشغف لما بينامو فيه و يتنططوا عليه..
.بالنسبه لهم هو أكتر مكان في العالم ممكن يحسوا فيه بالدفى و الأمان و الامبالاة،
والمكان الوحيد الي ممكن يجمعهم مع بعض
و هيفضلوا يحسو فيه انهم أطفال مهما كبروا.
و بفتكر واحنا صغيرين كنا بنحسه كبير قوي

و ماتقدرش تجيب اخره،
و من كبره كنا بنعمله حلبه المصارعه الي بنقتل بعض فيها ضرب .
ي مكان في الدنيا ممكن يضيق عليك الا هو ...
فيه مغناطيس بيسحبك انت و اخواتك عليه،
وفيه بركه بتخليه يوسع و يشيلكم كلكم عليه ..
و تخيل الكلام وسط مربع بيجمعكم زي ده بيكون ازاي!
في الشتا كان البيت كله بيفضل نضيف الا السرير ده عشان كنا قاعدين نايمين
واكلين, شاربين ..حتى المذاكره كانت عليه!
لما تحب تختفي وتشبع نوم بتنام عليه، و لما تعيا بيعزلوك عن بقيه اللي في البيت فيه .. غطاه

أكبر من اي غطاء، و دفاه بيجي من نفسنا و ضحكنا ولزقتنا في بعض واحنا قاعدين...

و فكرة انك تحرك نفسك بعد ما دفيت مكانك دي عايزه قلب ميت !!
منتهى الأمان انك تقوم تستخبى فيه بليل

و لو هاتنام تحت رجلين أبوك و امك، وكأنه فيه مناعة ضد الكوابيس والتفكير والقلق!
بفتكر يوم المطر كان والدي يلمنا كلنا عليه، عشان مانخفش من صوت الرعد و يطمنا بحكاياته
القديمه عن الشتا و يفرحنا بخبر مفيش مدرسه النهاردة : )
كل الأحداث المهمة و المناقشات العائليه حصلت على سرير امي: الامتحانات و التنسيق و

العريس و الفرح، حتى الحفيد بيتولد ويجي من المستشفى على السرير الكبير، بيرضع و يتشقلب
و يتعرف على كل وشوش عيلته عليه!
يمتاز سرير امي بأنه: شكله ومكانه ما بيتغيرش كل ما تبصله تشوف ملامحك من ابتدائي لغايه

ما أشتعل شعرك شيبا .. و لما تنام فيه بتشم ريحه امك وابوك في قطنه القديم اللي كان كل فترة يتنجد بس عمره ما يترمي!

» سرير حوض السمك
» مفارش سرير روووعه
» مفارش سرير قمة في الجمال
» سرير يرتب نفسه بنفسه !!!
» مفارش سرير كروشيه روعة