مولانا العاشق

نبت في أحشاءي كجنين يرتع بين الضلوع
أسامحه على تقلباته أبكي ألما ثم أبتسم
أربت عليه داخلي وأنتظر ركلته التالية لأطمئن
:وسامحتيه كمان ؟
:كيف مسامحش اللي عشش جوايا يا سيدنا ؟
:سامحتي مرك فيه ؟ نسيتي البكا والقهر وآمنتي تاني للي غدرك
: منسيتش يا سيدنا ....منسيتش خوف من النسيان عمر اللي انكوى بالنار ما ينسى علامها فجتته
بس خايفة أموت بالخوف يا سيدنا
بقول لحالي ....ضناكي
كبر جوه الحشا
كبر فيكي
:والألم ؟
:كان مخاض
مر مني للكون ....يجوز الشمس زغللت عنيه ...شهق
يجوز كانت صرخة لاجل يعيش ويرد لحضني مشتاق لضمة
سامحته عالألم يا سيدنا بس مش نسياه
علم فجدران الروح لا القلب ولا الجدران يتحملوا شرخ تاني يا سيدنا
بقول لحالي يمكن أصله مش غادر يمكن غرته الدنيا كيف ما بتغر البشر ...غادر
:مآمنه ؟
:مرعوبة يا سيدنا ....خايفة ينفطم ويغيب معرفاش هقول لحالي إيه تاني
قلبي بيرجف رجف يمسح عليه ويقولي متخافيش ...أحاول
بس لحظة ما بيغيب يا مري ....ينقلب حالي ليل ولا اشوفش
:للدرجادي عشقاه
:يووووه يا سيدي بالك .....يوم ما بيتعب بحس روحي شاش بيضمده
ويوم ما يخاف ببقي يمامه ....وأفضل الف حواليه ابنيله من ضلوعي سكن يضمه
:داعيلك فرحك يطول
:من قلبك يا سيدي
:وازاي ادعيلك من براه يا بتي وانتي القلب
:مولانا
:كفي كلام يا بت قلب النور وميلي علي رجلي لاجل ارقيكي
مولانا العاشق

هل تتحرك المشاعر بالإلحاح ؟
قد يكون ...وقد يطرق احدهم قلبك ولكنك لا تحرك ساكنا
:مولانا
:اتوحشتك يا بت قلب الغيب
:تفتكر ينفع يا سيدي ؟
:كل سؤال وراه اجابات كتير يا بتي وانتي وحيرتك
:مشغوله .... ينفع ؟
:باين فعنيه عاشق يا بتي
:باين ....بس ينفع ؟
:القلوب ملهاش حكم ولا حاكم ....لا عقد ولا قاعده
:منيش خابرة يا سيدي ....قالي انه كلمك عني ...صُح ؟
:وحلفني مخبركيش ....قوم ينسحب علي وشه ويخبرك هوه ؟
:مقالش حاجه يا سيدني غير انه سألك ..سألك صُح ؟
:صُح
:وقلتله ايه ؟
:قلتله ميسيبش هواه للريح
:أنا ريح يا سيدنا ؟
:أنتي ؟ أنتي عواصف برق ورعد ومطر ...نهر مليان حياة وبحر بيقلب وبيبلع بين شمس وضحي
أنتي ؟ انتي حواء كيف ما ربنا خلقها انتي الست كيف ما ربنا رادها تكون
:مولانا
:هملي اللي عشقك للي عشقك ....روحي يا بتي قلب الشيخ متحمل حرمان هتحملية حرقة غيره كمان ....روحي يا بتي
:انا مفاهماش حاجه يا سيدنا
:فضل ونعمه وخير وبركه وستر وعافيه من رب العالمين
:مولانا
:كفي كلام يا بت قلب النور وميلي علي رجلي لاجل ارقيكي ...خلص الكلام
مولانا_العاشق

:مولانا
:اتوحشت صوتك يا بت قلب النور...وشك دابل وعيونك غايره ....مالك يا كحيله
:زينه يا سيدي ....زينه
:كني معارفكيش يا بت قلبي ...والله اتوه عن عمري وما اتوه عنك
:والله كن الوجع حب عيشتي يا سيدي.....كل مقول فرجه قريب...تغيم تاني
:حيرتك بيدك....ووجعك بيدك
:كيف يا سيدنا.....ولا اختارته....ولا حد اختار شقاه يا سيدنا.....بنقول بلا وواقع...ونرضا بقضاه. ....بس رسمه الضحكه عالوش صعيبه يا سيدي صعييييبه......مرار يا سيدي مرار
بالك يا سيدنا....والله ما بخلت علي حد حنيه...قريب وبعيد...كبير وصغير....والله ما بخلت
هو عيب يا سيدي .....عيب استناها منه....سلمته روحي بيدي وقلت اكونله دار .. يكونلي جنه.....انا قلت عوض ربنا فيه....واكيد الصبر اخره خير.....بس والله كن العيب فيا...والفرح مش مكتوب
بالله متقولي كلام الناس.....وادي حب ومتستني....والله بقوله لحالي ليل مع نهار....بس صعب
بقول ادي... فاقد الشئ...وبعطيه بزياده...بقول الدوره تدور.....ويجي عليا الدور....وبدر الحب يطرح ورد....القا الصبار مسايبنيش لحالي....ازرع خير....واحصد وجع
قلبي ما عادش متحمل.....ما عادش متحمل
الوجع طال كل حته فجتتي يا سيدي.......كتير عليا اطلب من ربنا يرزقني عوض....بايني طمعت...القسمه مش مقسومه....والفرح ضانن
اقولك.....يكونش محتاج لواسطه.......وانا طول عمري مالي ضهر
تكونلي واسطه عند الفرح يا سيدنا ....ويكونلك الاجر عند الله
:خلي بينك وبينه عمار واكونلك واسطه وادعيلك يفتحلك بيبان الخير
:حطيت حالي بيده....واديته قلب وروح....بايني طمعت يا سيدي....بايني طمعت واختارت وانا مالي خيار.....وادي االلي نطرته هلال بعد هلال....بخلان عليا حنيه....والله الطلب باينه غالي
ولا الروح هي اللي رخيصه.....
:داعيلك يا بت قلبي.......
:ادعي كمان يا سيدنا....ادعي كمان....والله اتوحشت الهنا
:كفي كلام يا بت قلب النور
:مولانا
:شششش ميلي علي رجلي لاجل ارقيكي

مالك يا بتي عيونك زايغين ولونك خريف
:تعبت شقي يا سيدنا
:قلتلك داري علي ضحكتك ما تنضامي ...ما حد شاف بسمتك الا وجال لا زارها هم ولا شافة ميلة البخت
:والله حاسه نفسي مقطوعة النفس والحيل يا سيدي ....بلهث حاساني بجري في سباق منيش دريانه ميتي بدا ولا ميتي يخلص
روحي مشقوقه نصين
والتنين نافرين من حالهم معارفينش يتقابلوا ..بلحاقش اقوم الاجي اليوم ولي ....هي الخلايق كلها زيي....بتمر ايامهم كيف ما بتمر ايامي ولا انا لحالي اللي فقدت ريحة العمر يا سيدي
:لاه يا بتي انتي اللي ارتضيتي الشقي ....وشقيتي حالك بيدك
:بخاف الساعات الفاضيه من العمر ....بخاف افكر باللي غاب واللي فات واللي راح ولا رجعشي واللي حبيناه ولا طولناهش بخاف الوحده يا سيدي ل اعد صوابع يدي والقاهم ناقصين شبكة يده ...بخاف اسمع دماغي صوتها يعلا....وانشغل علي الغايبين ...شقيانه بكيفي بس غصبانيه يا سيدنا لو سلمت حالي للفضا هشقي بروحي وشقي الجسد شي وشقي الروح شقي تاني
الجرح غاير والم الروح صعيب مايداويه غير موت ...تفتكر هيعرف لما اموت؟ تفتكر هيحس حاجته نقصت ؟ تفتكر هيجي عليه يوم يتفقدني وما يلقاني ؟ تفتكر يا سيدنا
:وهتفرق وياكي فايه.الموت ...موت
:والله منا خابره بس يمكن دعوته ترد فيا الروح
:الموت موت يا بهيه
:مولانا
:كفي كلام يا بت قلب النور وميلي علي رجلي لاجل ارقيكي خلص الكلام

: منا قلتلك ومصدقتيش
:وشي منك فالأرض يا سيدي ...بس أمانة متحملني فوق حملي
: حملك ؟
أنهو حمل فيهم يا آخر خيبتي....حمل المغادر؟
أقولك غادر
تقولي ضنى
اقولك هيسيبك
تقولى وعدنى
كيفه حملك التو يا حزينة؟
: بتعاتبني على صبري ؟
على أماني ؟
على يمين الله اللي كنت بسمعه ليل نهار؟
بتعاتبني على إيه يا سيدي ؟ منا كان لازم أصدق
ومصدقش ليه ؟
لحد آخر لحظه ...لآخر يوم بيحلف إنه مش هيسبنى
: ونفذ ؟
:......
: إنطقي ...نفذ ؟
:......
: ودي دموع ايه ؟
ندم ؟ ولا شوق؟
: حسرة يا سيدي حسرة وحرقة قلب
: إبكي واغسلي روحك و انكسري كمان
يمكن تعرفي قيمة حالك
بقالي سنين صابر عليكي.وأقول هتحس
هتشوف
هتصلب.عودها وتفوق
وإنتي لا عندك بصر ولا بصيره
كلمتين يا بتي يمكن يصيبو قلبك يفوق
خلاص
خلصتين يا بتي
الطباع يا بتي ملهاش دوا.. ومفيش فينا بني ادم ملوش علة
بس في علة نتحملها متأذيش
وفي علة تأذي صاحبها
وفي علة كيف النار....تحرق اللي حواليها متخليش
حد يقف في وش النار يا عليلة ...حد يقف فوش النار
النار ....بتنهش كل حي وميت مبتفرقش
لا بتميز خيرها من شرها ....ولا بتسيب الطيبين وتنهش الأوباش
النار....نار
معندهاش ضمير
فوتي من وشي مطايقش اطل فوشك
فوتي
: مولانا
: ششششششش خلص الكلام
مولانا_العاشق

كنت عارفه يا سيدي
:عرفتي ايه يا كحيله
:عرفت ان اليوم جي....كنت عارفه ان اليوم جي....والوعد جي
:مفيش حلو دايم ولا حزن دايم يا بهيه
:الحلو مابيلحق يعمر اراضيا يا سيدنا...كنت عارفه ان الحلو هيمر علي ارضي يسقيها وميرويشي....ويمر....يعمر صحاري غيري ...مع ان ارضي خصبه والله يا سيدنا....تحب الزرع والخضار والزهر ....ليه اراضيا غاويها البوار؟ ليه كل منفتح للفرح طاقه تيجي الريح وتسدها
طب بلاش
انا رضيت يا سيدي....رضيت اكون هامش....رضيت اكون خط فقلب صفحه مش ليا....رضيت اتملي فالهنا من بعيد....ليه مرضيونيش؟؟
طب ليه....ليه يسحبوا خيري.....ويرحلوا....ليه ياخدوا مني زادي ويولوا
ليه يا سيدنا
ليه مسابونيش احلب حلي الايام بالزيف......وارعي اللي فاضل من حشاش الروح. فسنين عجاف ...ليه مسابونيش
:فيه ناس يا بتي تشوف الخضار تفرح وانتي خضارك رغم قلته طارح
اللي زيك يا بت قلب النور...خضاره...نور
يهدي ويعمي....وشرخه سهله
خبي خضارك ....داري خضارك العيون صايبه
والطامعين اكتار
خبي خضارك.....لمي اللي فاضل من اللولي فضحكتك ومتفرطيش فيها
اضحكي بقلب ولا تبانيش....داري علي خضارك يقيد
:والله ضحكتني يا سيدي اضحك بقلبي؟؟؟؟ لما ضحك الشفايف زيف لاجل نسر عين الناظرين ونشيل عن الخلايق همومها....ضحك القلب نزيفه ازاي......والله ضحكتني يا سيدي
:كلامك قاسي
:يا ريته القلب يقسي كيف الكلام....يكفيك شر الخيبه فالشيبه يا سيد الناس
:كفي كلام يا بتي ....كلامك مر
:مولانا
:شسششش ميلي علي رجلي لاجل ارقيكى

: بخاف الوجع ولا اخافش الموت يا سيدي
:مفيش حي ميخافش فراق الروح يا بت قلب النور
:الوجع بيموت يا سيدي ....الوجع بيموت حته حته
الوجع انواع يا سيدي
وجع الغربه...يقتل احتياج الناس
وجع الخيانه...بيقتل روح
وجع الفراق...بيقتل ونس
كل وجع يا سيدي بيموت فينا شئ لبين متلاقي الموت مرافق كل شئ جواك مش فاضلك الا نفحه الخالق فيك....تلاقي نفسك قوي
قوي علي كل نقطه ضعف فيك
قوي علي كل حاجه عوزتها تزهدها كيف مازهدتك
يومها مش هتلاقي نفسك تخاف الا الوجع
:ليه....مش صيرتي اقوي مالوجع؟
:اخاف ليكونلي فيا ضعف تاني مدريتش عنه شي ...اخاف اضعف لمخلوق بعد مظنيت اني ما بضعف الا للخالق...اخاف اخاف ضعفي من جديد وارجع استني
:تستني ايه؟
: استني اقوي عليه تاني ....لكن الموت...الموت لقا....عوده بعد وحشه
الموت ضمه ....ضمه نور...الروح بتعود لاصل النور..الموت مبيخوفش يا سيدي....الخوف بيموت ..والوجع...الوجع بيموت
:الحكمه صابت عقلك....ولا الوجع صاب روحك
:مش فارقه يا سيدنا المهم اني انصابت
:كفي كلام يا بت قلب النور وميلي علي رجلي لاجل ارقيكي
:مولانا
:كفي كلام يا بت قلب النور...مات الكلام
مولانا_العاشق